Sustainable finance for all: why it is important and how can it be useful for us and our planet

LSFI

Beschreiwung:

D’Luxembourg Sustainable Finance Initiative (LSFI) ass eng net-gewënnorientéiert Organisatioun an déi zentral Koordinatiounsplattform fir nohalteg Finanzen zu Lëtzebuerg. Si déngt als zentrale Kontakt- a Informationspunkt fir all Akteuren am Beräich vun der nohalteger Finanz zu Lëtzebuerg.

Gegrënnt gouf d’LSFI am Joer 2020 vum Finanzministère, dem Ministère fir Ëmwelt, Klima an nohalteg Entwécklung, Luxembourg for Finance an dem Héije Conseil fir nohalteg Entwécklung. Dës Grënnungsmembere si vertrueden am Verwaltungsrot vun der LSFI.

D’Missioun vun der LSFI ass et, Sensibiliséierung ze stäerken, d’nohalteg Entwécklung am Finanzsecteur ze fërderen an d’Transitioun zu méi Nohaltegkeet z’ënnerstëtzen. Si entwéckelt a setzt och d’Strategie fir nohalteg Finanzen zu Lëtzebuerg ëm. Den Aktiounsplang, deen Deel vun der Strategie ass, baséiert op dräi Haaptpiliere:

Sensibiliséierung a Promotioun
Potenzial fräisetzen
Fortschrëtter moossen

Ënnert all Pilier falen verschidden Aktivitéiten, déi der LSFI hëllefen, hir Missioun z’erreechen. D’LSFI schafft dobäi enk mat lokalen Akteuren zesummen: Associatiounen aus dem Finanzsecteur, Bildung, inklusiv Finanzen a Vertrieder aus der Zivilgesellschaft.

Wat ass nohalteg Finanz iwwerhaapt?

Wat bedeit et?
Wat huet dat mat mir ze dinn?
Firwat ass et wichteg?

Zil vun der Sessioun:

Dës Sessioun soll Schülerinnen a Schüler sensibiliséieren, wat nohalteg Finanzen sinn a firwat se eng wichteg Roll an eiser Gesellschaft spillen. Si weist och, wéi jidderee vu eis duerch Alldagsentscheedungen, Spueren a Investitiounen zur Nohaltegkeet bäidroe kann.

D’Sessioun kombinéiert Theorie, Beispiller an interaktiv Aktivitéiten. Si bitt eng Aféierung an d’Grondbegrëffer vun der Finanz- a nohalteger Finanzwelt, erkläert aktuell Erausfuerderunge wéi de Klimawandel a weist, wéi d’Finanzwelt dozou bäidroe kann, dës ze léisen. Et gëtt och en Abléck an déi Haaptprodukter am Beräich vun nohaltegen Investissementer.

Fir d’Sessioun dynamesch a verständlech ze gestalten, ginn d’Informatioune op eng einfach an interaktiv Manéier vermëttelt. Aktivitéite wéi Wourecht-oder-Falsch-Fragen, Aarbecht a Gruppen oder Pairen hëllefen de Schüler, d’Theorie direkt ëmzesetzen an zesummen ze diskutéieren.

Léierziler: D’Konzepter vun der Finanzwelt entdecken, wéi de Budget, d'Spueren an d’Investissementer; den Impakt vun finanzielle Choixen am Alldag verstoen; Handlungshebel identifizéieren, fir Themen am Zesummenhang mat nohalteger Entwécklung besser unzegoen duerch d’Finanzen; dës Konzepter verstoen a verständlech erklären; Informatiounsquellen fir nohalteg Investissementer identifizéieren.

Kompetenzen: Initiativ/Initiative, Kommunikatioun/Communication, Kreativitéit /Créativité, Kritescht Denken/Esprit critique, Problemléisung/Résolution de problème, Sozial Bewossstsinn/Conscience sociale, Upassungsfäegkeet/Adaptabilité, Virwëtz /Curiosité